英超，走得快，靠歷史數據、排名貼波，唔多可靠，有時拗吓氣，同吓名牌球隊作對，總會有意外收穫。明天「拆禮物日」，快車首輪，冒進啲，揀頭場，攻擊1哥車路士，倫敦打吡，藍軍迎戰第4嘅韋斯咸，直取5.1倍D。
如果係上季1月杪同地對賽嘅狀況，車路士主W開1.23倍勉強合理；但波係圓，好似近排睇世冠盃，完全唔入流嘅新西蘭球隊奧克蘭，竟然11天內連鬥世界各地4支「勁旅」，未喺90分鐘輸過，最後攞埋季軍，盡碎球評家眼鏡，長捧佢對家，真係慘情！賭熱門，有時注碼會越玩越大；呢樣就係好多人話，足球博彩嘅吸引力，唔及嘥時間左刨右度、但回報率高嘅賽馬。車仔今季聯賽8戰主場全勝，但明鬥韋斯咸，係佢哋將會主場面對，暫時排名最高嘅對手，戰情未必一面倒喎！
上季「車、韋」兩軍在史丹福橋球場爆冷踢成0:0，賽後摩佬嘲對手踢緊19世紀足球，死守到底；事實亦係車仔全場39次攻門9中框，「槌仔幫」1射1中，俾摩佬寸冇所謂，韋斯咸有分落袋，攞番自信，結果之後連勝4場聯賽，奠下護級成功基石。事隔不足1年，話事人依舊，車仔大部份正選仍喺陣中，霸氣如昔，今季封王呼聲高；但韋斯咸換咗大半隊，勁在換入嘅多位外援，差唔多全部對辦，大Sam哥啱啱六十大壽，教波十幾廿年，呢幾個月最型！
博冷都要有理據，車仔上仗周一夜波作客史篤城，開波兩分鐘已靠角球，由中堅泰利頂入，成個戰局變晒，之後縮番後啲，贏2:0走人，順風順水得嚟有啲意外。再講，車仔上仗主要續收起奧斯卡杜斯山度士，差唔多「夫添」北上，主力休息期較韋斯咸起碼少兩天；相反，韋斯咸上周六主場輕鬆贏般尼兩粒，近排軍容齊整。
舊人達寧喺鑽石陣嘅尖端踢到曉飛，安祖卡路爾復出唔夠1個月，體力十足，喺敵方禁區成部人形坦克車，34歲嘅泰利睇吓仲有冇霸氣？最重要，當然係回流英超嘅防中桑治，係大Sam全攻型背後嘅重要守護者。仲有係韋斯咸今季作客入波，暫時排第3多，仲每場必有波入；隊波個form轉晒，又唔使再為護級煩惱，應該唔會好似上季死守博和，佢哋偷雞冇壓力，波友敲冷又何妨？
作客贏車仔，好難，唔使博[+1]，一注冷和已足。篇幅有限，其餘心水在明天擂台提供，祝波友，假期愉快！
文：波神