條路點行，真係大家自己揀。自由黨田北俊喺政圈打滾多年，今年因為唔多畀面CY，搞到全國政協委員都冇得做，但田少應該覺得咁仲好，每年3月兩會唔使北上，可以抽多啲時間陪孫㖭！
一生不羈放縱愛自由嘅田少，喺聖誕期間飛咗去奧地利，向佢啲孫兌現承諾齊齊滑雪，點知田少到埗後先發現揀錯路，幾乎雪都滑唔成。
佢噚日喺fb上載一張喺一座雪山山頂影嘅相，大嘆今年揀錯路，事關北美洲落大雪，但係歐洲唔多，所以去到山頂仲見到綠草，路牌亦顯示滑雪徑變埋紅色，閂咗（圖）。
冇得滑雪，其實好小事，正如有位網民留言，「希望田少嘅政治方向唔好搞錯就得啦」。