臨近聖誕，香港藝術館率先收到一份大禮──25幅著名中國畫家吳冠中嘅作品，估值近10億港元，令香港藝術館藏有嘅吳冠中作品增至77幅！
今次係香港藝術館第五度收到吳冠中嘅畫作，之前四次都係由吳冠中本人送出，今次就由佢個仔吳可雨捐出，係近年香港藝術館接收價值最高嘅一批藝術品。吳可雨噚日仲特登由新加坡飛嚟香港出席捐贈儀式，非常有心。
吳可雨捐嘅呢批作品，包括16幅油畫、9幅水墨畫，包括名作《冰雪殘荷》、《漁港》同《四合院》等等。
「希望被大眾觀賞到」
原來已經係佢擁有嘅全部吳冠中作品。吳可雨話，批畫係爸爸嘅心血，自己都好有感情，但諗到自己年事已高，而爸爸一直嘅心願都係希望作品被大眾觀賞到、唔單只留喺收藏家手上，加上過去同香港藝術館合作愉快，好信得過館方會好好將作品向公眾介紹。
《冰雪殘荷》 1996年款 油畫布本
此畫繪於1996年，吳可雨卻說，畫中景象是吳冠中於1968年經歷文革的印記，殘荷蕭條的景象，如吳受批鬥時的苦況，畫中小小的紅蜻蜓，象徵困境中的生命力。
《四合院》 2003年款 油畫布本
吳冠中兒子吳可雨說，小時候住在北京有70多戶人家的四合院，生活很苦，其父吳冠中雖欣賞四合院的結構美感與沉鬱氣氛，但不願再居於其中。
李八方
mailto:[email protected]