年尾流流，香港有電視台拖糧，NBA就有球星接大信封；29歲嘅前入樽王J史密夫周一俾活塞裁走，球隊會分5年清還人工；而且轉咗自由身，好幾隊都想爭。
喺底特律呢個悲情城市，活塞自04年拎到總冠軍後每下愈況，今年搵嚟前魔術教練史坦雲根迪任教練兼總裁，決心推倒重來。據美國《ESPN》報道，史坦已經決心斬纜賣斷J史密夫合約，最搞笑係J史密夫上年至加盟，合約到16/17球季先到期，未來兩年共2,600萬美金人工，活塞決定分5年逐年找540萬美金，叫做可以增加薪酬上限。經過48小時，J史密夫就會成為完全自由身球員，雖然佢今季嘅投射同3分命中率都創近10季新低，不過本身屬全能前鋒，職業生涯有15.4分同7.8籃板，年紀又唔大，搞到帝王、火箭、小馬同熱火等都想爭；火箭仲出動佢兒時好友懷特侯活做說客。
講開J史密夫下一站，小馬都係熱門，佢哋之前簽埋朗度諗住橫行天下，不過朗度第2場代表小馬就算攞到13分同11助攻，主場都以102:105輸畀J史密夫嘅母會鷹隊。
識睇，一定係睇足英台【英波Live】：
http://soccer.appledaily.com
http://bit.ly/engballlive