政府內部最近熱門話題，就係點樣同網民、年輕人溝通，而成日畀網民惡搞嘅陳茂波，佢睇嘅發展局竟然「身先士卒」，噚日係facebook登咗張祝市民聖誕快樂嘅改圖做賀卡，但就用咗高登仔成日出嗰張潮圖，即係機動戰士高達入面、阿寶話「人類總要重複同樣的錯誤」去改，但就換咗做疑似波波嘅聖誕老人，仲抽埋民建聯水，配上民記「專用」嘅「Marry Chrismax」！
八方不得不讚波波局長有膽色咁玩，有成近千九人like咗，比平日得十幾人like多好多，但網民留言則係插佢嘅多，八方都知呢個係網上文化，波波局長記住唔好删留言呀。