沙田馬場呢日(23日)有三組大閘，當中第一組1200米泥閘由東廐「正是你」勝出，此駒一早居前，直路蔡明紹輕騎透出，不受威脅下以一馬位之先輕勝。跑第二乃蔡廐「百戰百勝」，走勢有啲牽強，反應唔算太凌厲；反而第三名摩廐「活力歡騰」望空後追回唔少失地，走起嚟情緒集中步頭硬朗，表現相當好。
「活力歡騰」最近連贏兩場谷草賽事，銳氣正盛，隻馬至今跑快活谷未輸過，今課試閘所見，佢嘅狀態一啲都冇回落，而且似乎仲有進步空間。「活力歡騰」評分已高達103分，合適嘅谷草賽程唔多，估計會以1月7日谷草1800米三級賽一月盃為目標；而屆時佢嘅主要對手，極可能係呢日同組試閘跑第五嘅「勝哥兒」，方廐「勝哥兒」跑谷草1800米三次兩冠一亞，係上屆一月盃亞軍，當然希望今屆能贏馬補數，不過如果今屆真係遇上「活力歡騰」，「勝哥兒」將要讓9磅，可能係勝負關鍵。
講番「正是你」，雖然試閘勝出，但呢隻馬其實經常試閘神勇，但出賽就例落第冇獎金。而今組試閘跑第七嘅「睡德福」，乃雅芳婷老闆許章榮愛駒，曾在南非勝出1600米一級賽開普敦堅尼，今課乃在港第四度試閘，扣住走勢未見特別之處，進度不過不失。