財經事務及庫務局前局長馬時亨自從多年前因病離開政府呢個熱廚房之後，身體好咗、精神爽利不在話下，佢亦都熱衷出席各類公開活動，就連電視飲食節目都見到佢下廚露兩手，認真吃得開。2015年一開波，佢就已經有節目嘞，就係去教兩岸四地嘅青年人點樣喺職場上搵食呀。
青年民建聯將於明年1月10日舉辦「兩岸四地青年高 峯會」，探討兩岸四地青年人喺職場上嘅發展潛能。
馬時亨講呢個題目其實都幾啱，佢做局長之前其實係「小小超」李澤楷嘅愛將，2001年獲小小超邀請，由摩根大通私人銀行部過檔電盈（008）做掌櫃，馬時亨舊年嫁女，小小超都有到賀，可見關係保持得好好。需知道小小超出名係好有要求嘅老闆，馬時亨都應付到，由佢教年輕人喺職場上搵機會，應該有料到卦。