國家主席習近平日前去澳門主持澳門回歸15周年慶典暨新一屆政府就職，澳門當局做足「安全措施」擦鞋，大洗太平地禁止部份港人、包括與泛民中人同名同姓嘅市民入境，連同《蘋果》記者都被拒入澳。
點知習近平走後，禁令竟然仲未解封，噚日《蘋果》娛樂版記者去澳門採訪，經過卅幾分鐘嘅留難，包括帶入調查室查問，最後都係被出入境事務廳發出被拒入境通知書，話記者入境會對內部保安穩定構成威脅，需要遣返喎。同日《蘋果》財經版記者連同攝影記者赴澳進行正常訪問，攝記亦被拒，記者則如常入境。嗰位攝記話呀，上周去深圳做嘢時出入境如常，笑言澳門比深圳仲嚴密。