警方近年積極搞多元化宣傳，近排就同港台合作，拍攝咗一輯類似微電影嘅防止網騙宣傳片叫《自投羅網》，以一個小康之家為故事主人翁，引伸多種網上騙案，好似戲中父親陷入裸聊勒索、母親做嘢嘅公司墮入商業電郵騙案、嗰女又捲入網上拍賣騙案等。呢輯微電影被安排喺《警訊》節目播出，呢個月27日起一連三個星期六喺港台數碼電視第31台、以及亞視本港台晚上7時播出。
咦！亞視11月份嘅糧拖到今日仲未發放，新聞部講明如果大除夕都仲未出到糧，元旦日分分鐘停播新聞，咁就違反發牌條件，亞視就要關台，變相執笠，屆時警方呢套微電影隨時被迫腰斬，但警方話大家可以放心，因為可以喺港台網頁重溫。