噚日起至29號喺粉嶺遊樂場舉行嘅北區花鳥蟲魚展，開幕禮好犀利請到跨界別殿堂級代表，人形龍蝦狼太梁唐青儀做嘉賓。由於唔係主場，特區第一夫人狼太都好識做，冇再以經典造型亮相，反而好踏實咁改着中國刺繡圖案嘅啡色套裝裙，唔通想喺淡雅中見不平凡？
封嘴唔講齊昕受訪
見到狼太，八方梗係要追問吓，同佢不咬弦嘅囡囡齊昕，日前接受《都市日報》訪問盡訴心中情，作為媽媽又點睇？但狼太對此一概不回應，或者以免越講越多，惹嚟阿女唔like。至於家庭樂，當然就可講兩嘴啦，狼太透露，3名子女今年都會全部返香港過新年，佢都祝願香港市民聖誕快樂，新年進步，最緊要香港政通人和，人人安居樂業。
家人聚首一堂，開餐都係指定動作，但狼太冇講，會唔會擦餐勁慶新年，只係話呀，今年太多嘢做，聖誕行唔開去旅行度假，仲話如果有機會，會一家大細嚟睇展覽㖭。原來佢唔只對龍蝦，連對花鳥蟲魚都好情有獨鍾！
教育局局長吳克儉噚日都有出席開幕禮，佢唔評論警方因為佔領運動檢控學生，只係話關心學生求學、守法精神同安全問題，話所有學校都會盡量協助同輔導學生喎。