信義玻璃（868）主席李賢義年尾有喜事呀，聞說佢今個星期五（26日），即係Boxing Day嫁女，仲會喺香港嘅君悅酒店擺酒，大宴親朋。
李賢義原本只係一位普通嘅上市公司老闆，直至兩年前，佢親家張高麗躋身中共政治局常委，連帶佢都人氣急升。查實李賢義個仔李聖潑娶咗張高麗嘅養女張曉燕好多年，計埋都有13、14年，如果唔係張高麗成為政治局常委，都未必會被人挖出嚟講。
李賢義除咗做玻璃生意，亦係深圳地產發展商，有間信義房地產開發。聽講，星期五出嫁呢個女叫李培埡，就係喺呢間信義房產工作，幫阿爸打理地產生意。而佢未來老公好似係普通後生仔，冇乜特別政商背景，應該都係兩情相悅，唔係專登對過親家嗰種。