國泰航空（293）以前有多位高層都識玩音樂兼係唱得之人，前行政總裁陳南祿鍾意彈吉他夾band，前公關一姐莊偉茵跟名師學唱歌，仲經常喺國泰嘅聯歡活動獻技，雖然佢哋離開國泰多年，但原來高層表演唱歌呢個傳統冇變。
國泰本月中喺國泰城開聖誕Party，其中一個環節就由6位同事上台大唱一連串懷舊金曲，當中就包括今年初升做國泰銷售及市務董事嘅程鼎一，仲有識唱藝術歌嘅台灣暨韓國地區總經理楊偉添等高層。佢哋當晚輪住唱《You raise me up》、《Can't take my eyes off you》等金曲， 掀動全場氣氛。
可惜行政總裁朱國樑呢晚冇獻技，只係襯番Party氣氛，着件銀色閃閃背心，上台講咗幾句鼓勵同多謝嘅說話，睇嚟朱總要快啲練番一技旁身嘞。