上屆馬王「威爾頓」日前勇奪今屆香港盃，表現回復霸氣，當日馬主東莞首富鄭強輝冇出現，由兒子鄭家星擔大旗，代父上台領獎，認真威水。
24歲嘅家星之前主力拍電影，曾經響《葉問》入面做任達華個仔，《西遊記之大鬧天宮》中演哪吒，雖然佢已經宣佈唔再做幕前拍戲，要協助父親打理家族嘅地產、電影等生意。但家星話自己實在喜歡音樂，仍醉心於作曲，繼《再說一次我愛你》後，家星嘔心瀝血又有一首親自作曲，並由佢主唱嘅《不能忘記的事》面世，啱啱先派上KKBOX可下載，同fans分享，封面更係由家星親自拍攝，好有誠意。
《不能忘記的事》歌詞中，有幾句「燈火闌珊，浪漫燈海，等著你回來」，究竟家星等緊邊個呢？而作為馬迷，當然等緊「威爾頓」再出，希望再目睹佢嘅風采，估計「威爾頓」可能會跑1月25號1600米董事盃，而董事盃之前，家星另一愛駒「星爾頓」將會喺周日(28日)賽事率先上陣；「星爾頓」雖然冇「威爾頓」咁勁，但近兩仗取一冠一季，表現亦相當進步，尤其上場田草1600米，排14檔早段大包尾，直路發咗癲咁追上嚟只輸一馬位得季軍，可見隻馬跑長啲會仲好，今次大幅增程初跑2000米，如果交出佳績，正好為爭逐明年3月同程打吡大賽打下一支強心針！