個個去首爾都例必影相「打卡」嘅特麗愛（Trick Eye）3D美術館，香港分館噚日正式開幕。佔地7,000幾呎嘅展館座落山頂廣場，雖然比韓國嘅細唔少，但入面5個主題區都有成70幾件「錯視」展品，仲有個「探索香港」區，地標天壇大佛同維港靚景都有，全部任摸任瞓點玩都得，只要企喺適當位置就可以睇到立體效果。
Trick Eye香港總經理吳基藝同八方講，全部畫都係由韓國畫師嚟香港逐筆去畫，幅幅都獨一無二，每年仲會換一次，展品嘅質量同互動性其他3D藝術館係「incomparable （不可比較的）」。佢仲話新張期間只要拎住香港身份證，人人買飛半價，優惠去到1月15號。