事先聲明，我呢位身上留着一陣「低調奢華」的貴氣中產，絕不會因日圓低水而去東京，遠行只因一向以賣質素不賣減價的安縵酒店(Aman），今天於東京銀座大手町Otemachi Tower正式開幕，我呢位住過旗下在不丹、斯里蘭卡、布吉、北京和峇里等酒店的Amanjunkie（安縵粉絲），怎不即時飛去慶祝呢？
東京安縵，如過去幾年新開國際五星級酒店一樣佔領商業大廈幾層樓，今次是Otemachi Tower的33至38樓，共有84間客房。不過，安縵都算醒，位置不算高，但景觀一絕，近景有日本皇宮，中景有睛空塔加東京鐵塔，遠景是富士山，房房有靚景（如天晴）。
日本酒店以房間面積細小著名，安縵最細的客房都有710平方呎，以香港人量度方法，放到超過十隻牛，堪稱全東京最大面積的最細類型房間，最大套房有1,500平呎，做農場都得，最最重要是客房有大細價高低之分，卻全部設有私人溫泉，不用到老遠為一趟熱湯浴。如覺得獨浸溫泉太單調，可以去游一游30米長天幕泳池，竟有陽光照又有篷遮陰，一舉兩得。
如你去過不同安縵，應該都估到，新酒店同樣用日本最上乘材料，如樟木、和紙和在山拾回來的山石做材料、裝飾和擺設，突顯日本建築和設計精髓，加上利用玻璃透射光線形成不同幾何圖案，表達日本工藝細緻美學，行走迴廊間，仿如置身大自然，不像是在冷冰冰商業大廈內。
Aman Tokyo 東京安縵
房價：即日至2015年5月，雙人房每晚$3,920起
網址： http://www.amantokyo.com
記者：梁佩芬