現時既係老闆、又係立法會議員嘅新民黨田北辰，他日如果退休，做啲乜嘢好呢？八方覺得，佢都可以考慮轉行做魔術師，事關佢都有番幾道散手。
話說喺啱啱過咗嘅星期日，田二少獲愉景新城業委會邀請，擔任屋苑一年一度聖誕嘉年華會嘅表演嘉賓，佢話喎，今次表演唔係佢嘅「強項」唱歌，而係變魔術。佢話為咗呢次表演不斷練習。結果佢當日準備3項小魔術，包括令麻繩凌空維持打橫嘅姿態、喺空空如也嘅魔法袋變出糖果同貼紙、以及佢自己覺得最高難度嘅凌空倒汽水（圖）。
原來事前練習時，都唔係次次成功㗎，所以有啲觀眾比佢更加緊張，但佢話多得現場嘅小朋友好畀面，不斷為佢大聲吶喊，令佢無驚無險表演成功，之後仲有小朋友舉手話，想跟佢學師㖭！