見高就拜、見低就踩，似乎係NBA不變嘅定律。湖人周日作客帝王輸101:108，上個禮拜先超越波神、成為歷來第3得分王嘅拜恩，今場30射中8得25分，又俾人批評獨食、浪射，變番大家口中嘅輸波罪人，甚至有唔少人講，冇咗佢嘅湖人可能更加好。
拜恩全場射咗30球，總共炒咗22次兼有9個失誤，但唔好唔記得，佢已經36歲，上季重創只係打過6場波；今季一復出就場場chur到行，呢排開始展露疲態，今場仲打咗38分鐘咁多，臨尾俾人反勝就怪晒佢，似乎唔係幾公道。不過，拜恩都自己知自己事，話平時訓練、落場咩都做到足、搏到盡，搞到今時今日咁攰咁辛苦：「身體好誠實嘅，如果繼續咁落去，我根本就冇得揀。」佢話會認真考慮吓，休息番一、兩場，唞夠再出嚟爆seed。
湖人周二要鬥今季表現勇猛嘅勇士，橫掂都輸梗，不如畀拜恩休息吓，留力聖誕大戰射爆公牛仲好啦。後衞尼克楊格話：「（冇咗拜恩）畀個波我就搞掂，我隨時都ready孭飛㗎。」
識睇，一定係睇足英台【英波Live】：
http://soccer.appledaily.com
http://bit.ly/engballlive