律師會前會長、屯門鄉事委員會主席何君堯，有意參選立法會之心真係路人皆見，所以近年佢都好積極落區做宣傳，而喺噚日冬至，佢仲喺fb上載咗張關於屯門交通問題嘅單張，及佢落區派單張嘅相，話做冬前都要落區喎。
查實現為屯門區議員嘅佢，上載相片以示自己有做嘢唔奇，奇就奇在佢上載嘅單張上面，竟然寫咗幾個街坊名，有兩個名隔籬甚至仲有埋電話，似乎係收到街坊個案後、即時抄低佢哋嘅聯絡方法。咁樣雖然顯示到佢有心跟進，但有網民就批評佢咁做係冇保護到街坊私隱。八方噚日打電話問過何君堯，佢話唔知有咁情況，可能上載時太快手，冇留意上面有電話號碼呀。