「魔童」王維基大鑼大鼓要搞嘅港視（1137）網購平台上星期試業，令人記番起阿信屋老闆林偉駿早幾月都話要搞網購，仲講到網購送貨同香港人六、七十年代打電話叫火水咁方便，點知講講吓冇晒影，前日仲靜雞雞喺母公司CEC國際（759）嘅業績報告話唔做喇喎。
商場業主話減少限制
大家都知王維基今年初曾經搵過阿信屋合作，希望對方成為港視網購嘅商戶之一，後來合作告吹，阿信屋老闆林偉駿之後就話自己搞網購。
華華噚日問林老闆做乜忽然又唔玩，佢解釋話，𠵱家市面上已有唔少同行大搞網購，競爭激烈；加上個別商場業主唔畀阿信屋賣米，佢先至諗住網購送米，但係最近發現業主可能有得傾，咁咪將網購hold住先囉。至於會否搵番王維基合作，佢就話，「睇吓遲啲佢受唔受我玩啦」。