香港地有好多獅子山下嘅故事，恒隆地產（101）助理董事（集團傳訊）關則輝都係其中之一，佢兒時屋企冇乜錢，家住慈雲山公屋，一住20年，後來佢考到入香港大學，先至入到大公司工作。呢幾年佢喺恒隆都搞好多社區活動，今年就同樂群社會服務處合作，為黃大仙同慈雲山嘅獨居長者提供膳食，有機會幫番以前住過嘅社區。
關則輝話，唔係因為自己兒時住過慈雲山，就專登搵機會幫助呢區，只係咁啱同樂群傾到合作，而樂群又專門為黃大仙同慈雲山嘅長者服務咁箒。恒隆今年初捐咗百萬元畀樂群為獨居長者提供兩年膳食，上周六，佢哋亦同50多位獨居長者一齊食盆菜做冬。關則輝透露，恒隆冇特別設立慈善基金，都係視乎每次嘅合作性質，佢諗住遲啲會做多啲環保方面嘅工作。