【本報訊】有食客對鮑魚燒賣嘖嘖稱奇，甚至稱有冬菇味，亦有茶客咬落「有香口膠味但冇鮑魚味」，有街巿檔販一眼認出大連培植鮑魚苗，由於價錢廉宜，較受長者歡迎。
售賣大連乾鮑的德興海味資深店員黃伯，親嚐海港鮑魚燒賣後估計是鮑魚苗，他表示：「叫做有少少味……市面上都冇咁細，係剛剛培植出嚟，即係冇落過海。」
體積小 滋補效果細
黃伯指海味店不會售賣同類鮑魚仔，因為體積細，滋補效果大打折扣，「鮑魚苗功效當然細啦，（食幾多）都冇用㗎！」
九龍城海鮮檔主唐小姐則認出過往曾買入該類鮑魚仔，並且以20元一盆20至30隻出售，由於一隻不用一元，深受長者歡迎，但其後發現該批鮑魚仔養不大，放在檔內兜售時，不足一日便會死亡，損耗較多，自貨源緊絀後已沒有發售，不過間中仍有公公婆婆前來問津。
中醫師公會會長關之義認為鮑魚有滋陰及補肝腎作用，適合陰虛體質的人，最佳食法是連同冬蟲草及淮山等中藥煲湯飲用，清蒸雖同樣有療效，但不適用陽虛陰盛的人士食用，因鮑魚蒸煮過久會變韌，進食後容易消化不良。
記者：莫家文