今年buy-side認真難做，整體大市無甚方向，個別股份卻「chok」到冇朋友。尤其是12月，幾乎買乜輸乜，陷阱處處。如果唔好彩持倉安踏（2020）、比亞迪（1211）咁，一個唔覺意，即時唔見十幾廿個巴仙，年尾流流你話去邊到追番嚟？聞說今年有芬佬朋友表現零舍好，是關他數月前已差不多沽晒整個倉提早收爐去，故此避過一劫。
至於sell-side，今年生意反而較往年為好。首先IPO氣氛略為轉旺，就連二手市場，臨尾都有單平保（2318）逾360億元的placement，讓大家執吓飛仔。儘管香港失卻了阿里巴巴這宗世紀大刁，但仍為本港提供了些少連帶商機。例如有投行在阿里上市前夕，就到杭州碼實那班即將獲發巨額option的員工，於阿里掛牌後排住隊幫他們在美國沽貨。聞說單是沽option的佣金收入，已足夠養起整個銷售部門有餘了。
此外，今年債市暢旺，多間內銀發行優先股。加上國企改革開展，未來重組的交易陸續有來，賓架密密往北飛，爭取更多做刁的機會。
不過，對於明年市況，市場人士普遍不敢寄予厚望。尤其外圍經濟出乎意料地差，俄羅斯危機隨時拖累疲弱的歐州再次墮進深淵；而內地經濟放緩的速度亦相當顯著。朋友說，明年首季情勢可能凶險，各位投資者，睇路。
海迪