佔領完結，但分裂沒完沒了，一句「佢哋咁做原來係想證明激進未必有用」，激發勇武派向學聯發動新一輪攻擊。
事緣有線電視噚日播出後佔領系列，訪問咗佔中三子、雙學三個組織既主事人，其中學聯秘書長周永康Alex提到11月底佢哋號召行動升級包圍政府總部，旁述講咗「佢哋咁做原來係想證明激進未必有用」，之後就接落Alex度話「確係畀一啲期望升級為主既人見到，呢種行動未如理想」，辣㷫咗當日響應呼籲而搞到爆晒缸嘅勇武派，其中學生前線雖然無批評Alex，但就話學聯當日安排不周，將群眾推向險境，要譴責。
Alex事後喺社交網站解釋，訪問嘅講法純粹係學聯事後教訓同分析，11.30行動升級嘅目標並唔係要證明激進派係錯。佢對於自己不擅辭令，搞到公眾誤以為學聯希望升級失敗公開道歉。