港交所（388）行政總裁李小加出名能言善道，最叻打比喻、講金句，令人輕易記得佢講乜，聖誕將至，佢噚日竟然喺自己網誌，當自己寫信畀聖誕老人咁樣寫咗篇文，總結今年做咗乜東東。
唔講唔知，原來佢今年成功減肥，減走兩磅咁大把！佢都知兩磅唔算乜嘢，但係話對於佢呢類鍾意食嘅人嚟講，減到兩磅已經好勁㗎喇，佢平時最鍾意踢波，港交所員工有組球隊，佢一有時間就會落場踢埋一份。
佢都唔怕瘀，提到本月初北上跟深交所嘅足球隊對壘，雖然可以踢半場，但係連波皮都掂唔到，佢希望聖誕老人送份禮畀佢，等佢明年落場時可以入番幾球，唔好喺啲後生同事面前咁失威喎。
佢又讚同事今年工作勤力，希望得到聖誕老人嘅獎勵。其實呢樣佢就唔使同聖誕老人講喇，佢係話事人，佢拍板派多啲花紅畀同事咪得囉。