孫子兵法中有云：「知己知彼，百戰不殆。」要喺近期內地個市中戰勝對手，首要條件要了解大媽投資的法則！自從舊年金價暴升一役後，中國大媽喺國際間已經打出名堂，有個國際化嘅英文名「dama」，所以大媽絕對係有必要了解嘅強勁對手。
從多個渠道了解到，一般輕量級大媽，身懷彈藥數十萬元，中量級大媽彈藥有數百萬元，重量級彈藥約數千萬元，一般投資喜好以實物為主，所以金市同樓市係佢哋主要嘅集中地；對於金融市場嘅了解，以100分為滿分，大部份處於水平以下兼且偏低水平，甚至有人對大媽評分係零。
終於到重點，投資策略：人云亦云，高追低唔沽。簡直對大陸個市升完可再升其中一個完成演譯。佢哋可以睇都唔睇扔一百幾十萬元出嚟入市，自然係有高人教路，股神畢菲特？唔係！佢哋無我哋咁膚淺！係隔籬屋或者樓下個X姓師奶！
作為玩開港股國際市場嘅老散，要戰勝dama並唔容易，內地近期已有理財公司打大媽主意，專門幫佢哋提供唔同投資產品，將佢哋集中成為大戶，理財公司可以賺到佣金唔在講，對於想透過滬港通入去A股市場玩下嘅老散，dama條路都可以因此而容易捉啲，個市可能無咁難玩。
李可強