【中環】特首梁振英（CY）二女齊昕言行出位所以經常見報，相反佢個妹頌昕就比較低調，除咗當年老竇梁振英選特首佢有幫手拉票，同放假返港俾記者影到同母親唐青儀行街外，平日都好少曝光，上個星期四（18日）下晝3點幾，本報發現頌昕喺中環置地廣場同個女仔朋友嘆下午茶，當日頌昕打扮樸素，唔認得佢嘅話，好難估到佢係特首個女。
拎定銀包鬥快埋單
今年21歲嘅頌昕，個樣似足老竇梁振英，但打扮喜好同家姐齊昕好唔同，當日全身素色系，衣着超級簡約。頌昕當日同個女仔朋友傾得好似幾開心，枱面得番兩杯水，兩個人都傾唔停，最後頌昕發現餐廳開始多人等位先叫侍應埋單，仲好快手咁攞銀包出嚟同朋友爭畀錢，橙色PRADA銀包亦係佢全身最搶眼嘅物件，不過個銀包顏色都唔係今季款嘅，𠵱家專門店賣緊5千5百蚊，睇埋頌昕仲用緊iPhone5冇追新款，證明頌昕同好多年輕人愛追潮流嘅性格好唔同！
採訪、攝影：潘冠恩
