搞生意除咗要有諗頭，最重要夠財力，「超人」李嘉誠嘅維港投資早排安排旗下嘅startup，向一班學生教授pitch創投基金嘅技巧，俗啲講即係「𢱑錢秘訣」喇！
LED燈膽研發商Nanoleaf創辦人朱嘉鈞就話，準備一份靚嘅Powerpoint好重要，秘訣係要控制喺20頁之內，向投資人講解清楚團隊成員、未來商機、競爭對手、生意模式等等，精髓要放喺解決方案，最理想係可以展示一件製成品，或者用一條短片去介紹，絕對唔建議只係空有一條橋，冇實質嘢齋吹水喎。
參與呢個講座嘅，仲有借貸網站WeLend.hk創辦人龍沛智，同埋即將向和黃（013）提供人工智能系統嘅Sentient創辦人Antoine Blondeau，不過佢兩位冇朱嘉鈞講得咁具體，只係話要有良好往績之類。