上周二，俄羅斯央行把基準利率大幅提升6.5厘，至17厘，亞洲時段盧布大幅反彈至60盧布兌1美元以下，市場還以為俄幣危機完結之際，淡友再發功，盧布曾急滑至79盧布兌1美元。這次市場把焦點放於俄國償還外債能力之上，指俄國雖然仍坐擁逾4,000億美元外滙儲備，但不足找清國家及企業之債務，因此假如盧布繼續急挫，接下來很大機會出現連環式債務違約，其中油企債、高息債及俄國債持有人岌岌可危。負面情緒發酵下，強勢嘅美股亦創下11月以來嘅低位，而一直弱到震嘅港股更加不堪一擊，翌日以陰燭收市，低位及收市價均跌穿10月3日佔中後首個交易日水平。內地A股則繼續我行我素，外圍消息與它無關。以散戶為主嘅數千億元成交金額，只是比較關心內地孖展額多寡，以及入咗嘅股票有無得再升，世界大事唔關佢哋事。
一個負面消息盡顯三市不同嘅特質，美股強、港股弱、A股癲！至上周三起，市場氣氛好轉，美股借聯儲局短期內不加息為藉口大升兩日，假如標指今個星期以陽燭升破12月高位2079點，美股後市可看好一線。反而港股於區間低位反彈兩日後，走勢沒有之前咁樣衰，但未算走出困境，現時未係出手之時。如果一路有睇開本欄，又未對港股死心嘅話，可以等恒指出一支陰燭後，再升破陰燭頂部才出手都未遲，因為我哋暫時嘅主戰區仍然係A股，主力仍然係持有A股ETF如華夏滬深300（3188）、南方A50（2822）、平保（2318）等等，繼續「擁緊泡沫」。
滬港通話咁快已通車一個月有多，究竟AH股差價有無收窄？反映AH大型股份差價嘅恒生AH股溢價指數，就由開通日嘅101.8點升到上周五嘅123.8點，整體差價足足拉闊咗約兩成，亦係2011年以嚟嘅高位，未來會否持續出現同一間公司H股跌A股升嘅非理性走勢？2007年時曾經出現過，AH股溢價指數曾升穿200點，不過滬港通機制可能改變發展狀況。理論上，H股市場流通性高、香港市場法制較為完善，以及沒有外匯管制，H股應較A股享有更多嘅估值，H股有溢價才對。但實際上現時資金同情緒係內地都轉為正面，所以現時AH溢價拉闊，不足為奇。
留意H股新常態
反而更值得留意嘅係，現時經常出現嘅現象係，A股某板塊急升後，就有資金透過港股通來追入相關股份，雖然現時還是有限錢，未能與國際大戶較量，但假以時日，南下資金以十億元計之時，H股走勢嘅主導權分分鐘鐘會落入內地資金手上，到時極可能再炒一轉AH溢價收窄，而且有內地資金參與，大起大落地走向目的地就在所難免。所以明年某個交易日起，一堆大折讓H股突然暴升，隔兩日又暴跌，唔係奇怪之事，唔使花精力去找原因、找解釋，因為這是「H股新常態」，又名「完全A股化」算啦！戰友們，今年多事之秋，都係放假充完電先啦。祝聖誕快樂！
張士佳
註：筆者持有華夏滬深300