佔領運動結束一星期，三個佔領區回復原貌，不過，愛港之聲就唔知頭唔知路，繼續喺街頭「反佔中」。噚日愛港之聲就喺觀塘裕民坊附近，擺檔反佔中，仲out晒咁收集「反佔中」簽名，查實佢哋知唔知佔中已經完結。佢哋又嗌咪呼籲市民快啲做選民，用選票剔走「禍港議員」，話會協助市民填寫選民登記表。
八方畀足面，喺攤位企足半粒鐘，睇吓愛港之聲嘅聚眾能力，點知令人失望，上前簽名嘅人五隻手指數得晒，場面如同天氣般冷冷清清。愛港之聲嘅成員亦似乎唔係好落力，派單張都唔多落力。由於佢哋個喇叭太大聲，喺旁邊擺檔嘅寬頻推銷員就請佢哋將個喇叭移位，擺明唔想聽到「愛港之聲」。