2014年，好多藝人都有喜事，結婚生仔真係兩隻手加埋都數唔晒，不過有人結婚亦有人離婚，有啲仲搞到好大件事。
-豪門嫁娶-
首先講結婚，女星嫁入豪門唔係咩新鮮事，好似徐若瑄同黃婉曼都係人辦，今年2月徐若瑄就同新加坡馬可波羅海業集團主席李雲峰舉辦私人婚禮，而10月，黃婉曼就下嫁馬主男友馮柏基，喺尖沙嘴洲際酒店豪擺50圍婚宴。不過亦有人入豪門撻Q，好似九頭身美女吳佩慈，雖然2月為富貴男友紀曉波生下愛女「小蕊蕊」，不過婚期依然遙遙無期，紀曉波仲經常傳出有第三者，搞到吳佩慈要晒一家三口全家幅嚟擊退「飛來蜢」。
除咗女人會嫁入豪門，其實男人都可以嘅，好似「五億駙馬」黎諾懿同樂隊Mr.嘅主音Alan咁，黎諾懿11月迎娶家族坐擁逾5億元身家嘅落選港姐李潔瑩，不過黎諾懿表示全數孭起婚禮費用，仲唔會搬去女方大宅住，而Alan老婆Sally仲勁，家族身家成10億，而據知Alan婚後仲會進註老婆豪宅。
講到婚禮夠豪就當然唔少得豪門富二代，林建岳同前妻謝玲玲所生嘅長女林恬兒，4月就同全國政協常委兼星島新聞集團主席何柱國嘅32歲仔何正德喺法國結婚，5月就喺香港搞酒會，兩次都有好多名流商賈出席，堪稱世紀婚禮。
-星級婚禮-
另外，圈中亦有唔少星級婚禮，嘉賓陣容勁過頒獎禮，好似今個月結婚嘅蘇永康，9月結婚嘅Yumiko，10月嘅陳敏之及黃伊汶，8月嘅鍾鎮濤同范姜等，出席嘅嘉賓粒粒皆星，古巨基就選擇低調，7月同拍拖20年嘅女助手陳英雪（Lorraine）喺拉斯維加斯註冊結婚。
論最「突發」都莫過於周迅，7月佢同演員男友高聖遠喺一個公益活動現場舉行婚禮，仲直播添，一向低調嘅周迅，估唔到個婚禮會咁高調。另外，10年前因為美國嘅《American Idol》一句「I already gave my best, and I have no regrets at all.」而爆紅嘅孔慶翔，今年6月已經結咗婚!對象係同齡嘅執業護士Jian Teng。而「盛女Suki」亦同樣喺6月同保險男友Zion拉埋天窗。最「快手」就肯定係今年1月同劉愷威奉子成婚嘅內地女星楊冪，1月結婚，6月佢就生咗愛女「小糯米」，產後仲要極速收身，羨慕死唔少女仔。
-生B喜事-
結咗婚，接落嚟嘅任務就係生BB 喇，今年都好多藝人生B，好多都係第一胎添!好似倪震舊愛張茆，今年9月就為外籍丈夫K先生生下囝囝Omid，同月周杰倫舊愛侯佩岑亦誕下麟兒。3月名模Cara G.就生咗囡囡India Wilde，4月到梁靜茹誕下寶貝仔Anderson。同樣係首次懷孕生B嘅呂慧儀，就喺8月誕下「珍寶蟹籽」Anton。而豪門生B喜事就有汪圓圓9月為老公蔡加讚誕下千金。
而已經係「熟手媽媽」嘅，就有楊張新悅同洪欣等，洪欣2月為老公張丹峰誕下一女，取名張晞彤。同月台灣性感女神林熙蕾亦誕下細女。楊張新悅9月就生第3胎，當時佢仲希望囡囡好似香港一樣健康快樂。
-藝人離婚-
除咗結婚生仔，亦有藝人離婚，有啲仲搞到好大件事，好似內地女星黃奕每次結婚同離婚都總有醜聞，佢同第二任老公黃毅清10月離婚，但係兩人不斷互相數臭，又爆出家暴疑雲，黃奕仲大晒自己紅腫嘅額頭相，但另一方面黃毅清又經常爆料，話黃奕俾綠帽佢戴，出席飯局開房，總之咩臭史都揭晒出嚟。
同樣遭家暴離婚嘅仲有歌手可嵐，佢話自己結婚四年間都受到丈夫不定期動粗虐打。而家暴新聞最轟動，相信係歌手趙頌茹同周永恒，阿Yu同Roy結婚12年，但周永恒今年8月被揭發推跌阿Yu在地，令佢面部受傷，之後仲有疑似Roy同第三者劉依靜(Ruby)嘅淫照流出，搞到滿城風雨，阿Yu亦痛定思痛，下決心離婚。
今年3月，小雪亦因為長期分隔異地，同第2任澳洲籍華人老公離婚，到7月時，名模Amanda S.宣佈同結婚三年的老公離婚。而吳啟華10月亦宣佈同第二任妻子石洋子離婚，原因係兩人長期分隔異地。