「朋友，我當你一世朋友……」今時今日仲唱呢句，已經過時喇；曼聯嘅「插水王」艾舒利楊格就話畀大家知，咩叫反轉豬肚唔認人。曼聯上個禮拜六作客阿士東維拉，再次返舊會倒戈嘅楊格，除咗交出助攻幫紅魔搶番1分，仲跣咗舊隊友艾邦拉荷一鑊，令對方含冤硬食紅牌出場。
維拉開波18分鐘就由今季難得入波嘅前鋒賓迪基先開紀錄，但第1次為曼聯正選上陣嘅法卡奧喺53分鐘入波追平，最後就打和1:1完場，雙方各得1分。
不過，我求大俠就覺得，幫紅魔搶到分嘅最大功臣，其實應該係轉型打翼衞嘅楊格先啱；佢唔止有份參與追平嘅一球，助攻畀法卡奧頂入，仲令到對手打少件㖭。
楊格賽後先懶正義
追成平手之後，紅魔雖然大部份時間都控球在腳，但對住死守嘅維拉似乎冇咩辦法。去到65分鐘，形勢對紅魔更加有利。楊格同艾邦拉荷齊齊出腳搶波，結果迎面相撞，大家都應聲倒地。不過，唔知係咪因為楊格掂波先，撞到飛起嘅艾邦拉荷反而俾球證美臣舉紅牌趕出場。
艾邦拉荷喺英超生涯踢咗289場都未試過被逐離場，今次呢個紅牌初體驗，真係多得曾經做過4年隊友嘅「老友」楊格唔少。佢哋當年喺維拉雙翼齊飛，都威過一排㗎；可惜𠵱家各為其主，以前幾老友都已成過去。
維拉痛失兩分，領隊林柭梗係唔順氣，仲話門將巴特古辛賽後講，楊格親口向佢承認，艾邦拉荷唔應該攞紅牌，仲話其實犯規嗰個係楊格自己至啱㖭。維拉今場已經因為傷停問題，有成7個球員出唔到場，嚟緊聖誕快車期再冇埋艾邦拉荷嘅話，真係唔知點搞。
雲高爾：失分失冠
曼聯方面，今場只得1分，6連勝終於斷纜，而且俾榜首嘅車路士放甩7分，仲要打多1場，所以連綽號「戰術大師」嘅雲高爾都投晒降，話呢場和局，好可能就係令到曼聯輸咗今季聯賽冠軍嘅一場波喎。
識睇，一定係睇足英台【英波Live】：
http://soccer.appledaily.com
http://bit.ly/engballlive