本欄在月初提及，由太子黨揸旗嘅安邦保險，11月起狂掃內銀，佢買嘢嘅往績值得參詳。戰友們如果有興趣跟呢班太子黨搵食，已經係大有斬獲。
安邦保險重注買入嘅民行、金融街、招行，喺消息披露後，多次升停板，已經唔係眼光精準咁簡單，而係本身已經有咗太子黨效應，帶嚟點石成金效果。
安邦董事長為鄧小平外孫女婿吳小暉，股東有中共開國元帥陳毅之子陳小魯、前總理朱鎔基之子朱雲來等猛人，2004年開檔，以民企身份取得保險牌，至今資本已暴增逾千倍，非常之唔簡單。
民行於11月28日公佈，安邦保險已成為大股東，A股股價至今已暴升34%，另一間公司金融街，亦在12月初稱獲安邦保險入股，股價升幅超過三成。
另外，聯交所股權12月9日資料顯示安邦增持招行（3968），A股股價翌日彈升8.3%。
內地傳媒唔敢開名，直接提安邦嘅太子黨效應，只能稱之為「安邦保險概念」，總之大家心照。
不過，內地股民都相當醒水，見到啲太子黨掃貨，就合埋眼跟上車，總之唔會執輸。
李可強