學生Y未在中大畢業時，曾往加拿大做交換生，約莫半年，原來加拿大人幾鍾意去古巴旅行，舊年古巴一年迎接咗三百萬名遊客，其中一百萬人就來自加拿大，其餘主要來自英國、意大利、西班牙、德國等，美國人因為與古巴無邦交，而且美國對古巴實施禁運，故此美國人只能在十二項例外情況下到古巴旅行，包括新聞採訪、教育、研究、出席專業會議、宗教、體育運動競賽、家庭探訪等等。學生Y在加拿大見到旅行古巴嘅宣傳，心諗機不可失，返香港後就難以咁容易去古巴咯，於是就一個人去古巴做背囊遊客，得到嘅印像係古巴人生活貧窮（與美加香港相比），物品供應不足，對政府不願多談，但基本上生活快樂、老實、友善，鍾意向外人推銷雪茄。
都好，學生Y呢代，對卡斯特羅不甚了了，能親自到古巴領略吓中國1980年以前嘅社會主義方式生活，甚有意義。不過學生Y返到香港之時，講到古巴，曾有一句：「你地要體驗五十年不變嘅古巴，快啲去咯，我諗若然美國解禁，大量美國人湧去古巴渡周末嘅話，古巴好快就變成越南、中國今日模樣。」
眨吓眼過咗三年，學生Y所言可能會成為事實。十二月十七日美國時間星期三，奧巴馬總統在事先無任何風聲之下，突然宣佈美國與古巴初步達成恢復外交關係協議，互設大使館、解除禁運、旅行限制等等，詳細技術問題當然要雙方繼續談判，但大原則方面已定，唔怪得夏灣拿在中午時間教堂鐘聲大鳴，慶祝新時代來臨，但美國有好多古巴裔難民後代，佛羅里達州著名參議員Rubio聲言反對，民主黨參議院委員Menendez指責奧巴馬獨自行事，事先冇諮詢國會兩院，講明會用盡一切方法阻止解除禁運。奧巴馬要在離開白宮前締造歷史，結束1959年以來美古之爭，還需努力，現在笑得最甜嘅就係卡斯特羅，佢與美國鬥爭五十年以上，美國人卒之肯向佢「投降」談和，點會唔笑到猛咬古巴雪茄吖。但笑到最後嘅，可能會係奧巴馬，佢生於美國入侵古巴失敗（1961）之年，五十三年來美國硬功無法推翻卡斯特羅，現在改用軟功，一旦建立邦交，解除禁運，大量美國人到夏灣拿渡周末之後，花花碌碌嘅美鈔更容易觸發古巴人生活思想質變，導致古巴出現brain drain（人才外流），淘空古巴大學，為古巴人民主思想「啟蒙」，若然卡斯特羅在20年內還未去見馬克思，到時好可能會激到喊。