小馬嗰塊冠軍最後拼圖上周六隆重登場！啱啱加盟嘅控衞朗度以正選身份演出地標戰，幫小馬主場以99:93反勝「馬刺B隊」，都叫有個好開始。
領小馬反勝馬刺B隊
一如所料，呢排打到有氣冇碇唞嘅馬刺今場留力， 7個上季冠軍主將都冇落場，得番戴奧一個常規主力帶住班大後備，惡鬥啱啱組成星級正選陣容嘅小馬；但表現絕對唔失禮，完半場仲意外領先47:42㖭。不過，小馬下半場開始發力，第4節更加變咗得分後衞艾利斯嘅例牌表演時間，單節攻入13分，協助球隊以6分反勝；全場計，佢就射入38分，做埋今場得分王。
至於賽前萬眾期待嘅焦點人物朗度，今場就貢獻6分同9次助攻，首戰算係打得唔錯啦。朗度賽後就話第一次為小馬上陣好興奮，而最開心係最終贏到波。德國槍奴域斯基就大讚呢位新隊友，仲話佢已經熟晒小馬套戰術，甚至熟過部份隊友㖭。
有人問iso能力甚強嘅艾利斯，擔唔擔心控球權會俾朗度分薄；充滿自信嘅佢就霸氣回應：「我嘅角色唔會改變。朗度嘅存在，反而令我嘅工作輕鬆咗。」小馬基本上齊章，只要培養好啲默契，相信有更大嘅殺傷力。
識睇，一定係睇足英台【英波Live】：
http://soccer.appledaily.com
http://bit.ly/engballlive