俄羅斯盧布近日free fall，曲線造就中俄兩國嘅雙邊貿易。 講緊係對賺錢敏感度高嘅中國人，身在遙遠他鄉都要搞代購團搵番筆。
俄羅斯盧布今年起兌各國貨幣弱過藥煲，兌美元跌之外，兌人仔都一樣跌。好多喺俄羅斯打工或者讀書嘅中國人，都睇透與其揸盧布，不如搵番人仔好過，迅速用代購賺盡滙水。好似iPhone同名牌手袋、手飾等等，都因為滙率嘅差別，變相減價平賣。以蘋果iPhone 6、16GB版為例，12月初喺莫斯科嘅百貨公司，每部賣3.1萬元盧布，折合700元美金，變相4,000幾元人仔就可以到手。上星期盧布急跌，蘋果公司立即關閉網上商店同加價兩成半，不過iPhone 6嘅售價都仲係平過中國，每部折合3,600元人仔，差價達1,600元人仔，扣除運費後，仍有水位賺。奢侈品牌LV手袋喺俄羅斯售價亦因為盧布貶值比中國平一半。喺俄羅斯嘅中國外勞同留學生，就用WeChat搵生意，甚至喺淘寶開代購網店。有報道話，一間代購網店單係上個禮拜首四日已經有3,000幾人瀏覽。
強國人呢份鳩嗚嘅快樂，確確實實建築喺俄羅斯人嘅痛苦上。俄羅斯仲未好似中國咁做滙率操控，今次盧布大貶值，莫講富豪身家縮水，基層民眾都傷到入肉。有分析話盧布貶值兩成令物價飛升，當地食物價格亦加價三成。俄羅斯人一覺醒來發現落街冇錢買麵包，惟有自隊伏特加解解愁。
C+B
本欄逢周一刊出