【本報訊】「呢把刀，我到全世界都帶喺身上。」由愛食榴槤乜乜乜的反佔領人士，到配上啜核歌詞的劉江華大頭照，二次創作式改圖在社交網大流行，成為網民諷刺時政的新玩法。專門開發手機程式（Apps）的IT人黃明威，笑言小本開發，源自90後同事的妙想天開，「有人話怕年輕人，但喺呢度，佢哋肯定係重要資產。」正計劃將人氣改圖App帶進寶島的他說。
記者：呂麗嬋
走進M tel（八達網）的辦公室，像走進大學校園。「公司120人，我係最老嗰批頭三甲」。說這話的，是行年38的行政總裁黃明威（Willy）。
99年成立的M tel，是第一代手機應用程式開發商，也是首間靠Apps業務成功上市的公司。由早年與電訊公司合作研發增值服務，到iPhone出現，自家開發原創Apps，經歷行業變化。
新推出的WhatsCap，就食正「人人用圖表態」的Z世代溝通模式，累積下載人數逾百萬，連續八周高踞免費下載榜首位，堪稱本地手機程式之王。
請教年輕員工
WhatsCap大受歡迎，但Willy笑言，開發程式最初純屬玩票，「緣起facebook有個cap圖王，專cap TVB劇對白，有個同事衝入嚟同我講，話要先儲圖喺手機，好麻煩，點解唔索性搞個App？」
新一代App，由實用資訊到手機遊戲，五花八門；結合社交媒體，卻是新嘗試，「開會拋個idea出嚟，睇吓有冇人會用。咩App都好，有人用先有存在價值。」殊不知，小小的會議室內，竟是一呼百應。Z世代的溝通模式，70後的他笑言被考起，得請教公司內的年輕人。
就App的內容，也見世代鴻溝，「我個年代，最經典一定係周星馳！」三字頭新中年，由《國產零零漆》的「攞你命三千」，到少林足球的「做人如果無夢想，同條鹹魚有咩分別？」一見到就識笑。Z世代呢？則是膠劇/神劇對白；另如雨傘運動，也造就大量時事「金句」，由4點鐘許sir的「在地球任何地方都是不能接受的」，到CY口中「士可忍孰不可忍」，同樣大受歡迎，成為網上二次創作的流行材料。
「呢啲，真係要靠年輕人，我都跟唔貼。」Willy 很老實。WhatsCap內的2萬張cap圖，分門別類，主要由網民上載，收入來源靠植入式廣告。一盤生意，看似本小利大，但Willy謂在政治困獸鬥漩渦下，就算只提供平台，也得步步為營，「同一張改圖，有人覺得好笑，有人見到好嬲。試過放上去，同一時間收到好多投訴」。
一個平台，究竟保持政治中立，還是要有自己立場？就算是對粗口的接納程度，一樣大不同，「惟有加入選項，由用家自己選擇」。
摸着石頭過河，遇上自己不認識的，這個老行尊自言一樣要虛心學習。「時代唔同，就算我係老闆，都唔可以一言堂，開會時寧願投票解決。」
行業重創意，年輕人是重要資產，Willy謂雖也曾因年輕下屬「朝早起唔到身」、「一言不合鬧辭職」而氣結，但始終珍惜年輕生力軍，「一間公司要發展，冇可能自己做晒，惟有溝通多啲，唔好大石砸死蟹。」
從生活搵靈感
「我成日講，唔好當幫我打工，研發Apps嘅好處，係每個人都係準用家，覺得有興趣有用先提出，一手一腳去做，由市場決定得唔得。」
就如他，因為打邊爐時被女友「老點」買戲票，設計了讓他在IT界奪獎無數的「電影速遞」App；又因為甜蜜觀星卻弄不清東南西北，遂與太空館合作，推出附GPS定位的「星夜行」。橋王的橋，並不神奇，統統源自生活。
「呢行唔同食肆，有兩味招牌菜就無敵，市場變得好快，好多時來不及R&D，已係明日黃花。傳媒愛報道一朝發達嘅例子，其實更多嘅，喺市場只曇花一現，冇辦法生存落去嘅IT公司。就如WhatsCap，起步受歡迎，一樣要不時加入新元素，先會襟玩。」
由十人公司發展至百人團隊，這個橋王，不信神話，比你我都要清醒。
網上人氣改圖
■「花生友」已成為網民常用名詞。
■許Sir記者會的金句成為網上分享大熱。
■政府早前跟學聯開會，劉江華不發一言惹網民諷刺。
