湖人上周五主場鬥雷霆，正式為早幾日成為歷來得分王第3位嘅拜恩舉行慶祝儀式。對面嘅上季常規賽MVP杜蘭特養傷冇出，湖人梗係諗住可以開開心心，以一場輕鬆勝仗為拜恩贈興啦，點知雷霆「二少」韋斯卜克同第6人列治積遜咁唔畀面，分別攻入31分同25分，湖人最終以103:104飲恨。
湖人雖然賽前3日都冇比賽打，但係主角拜恩似乎未唞夠，今場都打得唔好，命中率得嗰兩成，最後兩秒仲絕殺失手，全場總計入得9分咁大把。一向孭開飛嘅「蝙蝠俠」表現失準，但自認係羅賓嘅尼克楊格（左）今次就幫唔到手喇。雖然叫做比拜恩入多1分，但佢喺第4節開波冇耐，就俾雷霆中鋒阿當斯成功挑釁，搞到忍唔住向對方喉嚨批踭想佢收口（圖），即時被判2級惡意犯規被逐離場，好大機會要停賽，打唔到周日作客帝王場波。
識睇，一定係睇足英台【英波Live】：
http://soccer.appledaily.com
http://bit.ly/engballlive