潘頓於國際賽日兩度犯規，共被罰稍後停賽六日，令佢剛禮拜三谷戰就算四喜臨門，亦未足以釋懷，好喇呢日田戰佢要繼續數糊至心息。第四場勝出容廐「贏男」後，第六至八場佢都搏殺失手做二奶，卒之第九場二班1650米泥地如願以償，策方廐「準備就緒」後上大熱掄元，此駒1.8倍成為全日最熱頭馬。
「準備就緒」近兩場跑田草同谷草都輸，今仗重新跑泥地馬上贏番，累積四戰泥地全勝，均是一哩，表現充滿新一代泥地王風範。練馬師方嘉柏繼禮拜三起孖後，呢日再添一W，繼續Head住大摩高踞榜首。今場賽果正過正菜，次熱門韋達操刀之「迎風飄揚」後上跑第二，大熱Q順利開出，但賽後韋達仍頭耷耷，似乎屈居亞軍相當失望。至於啡燈馬「川河猛駒」得第三，「川河猛駒」搭「準備就緒」之18倍啡燈位置Q畀落飛黨一錘定音，七位數字彩金袋袋平安！