又多一場經典！繼上周三輸畀灰熊後，馬刺上周五主場對拓荒者，又要打3次加時兼且輸波，創下NBA歷史。而38歲嘅不老大前鋒鄧肯，連續兩場打超過40分鐘都有好表現，認真老而彌堅。可惜對手有對住馬刺特醒嘅尼拉特攻入個人新高嘅43分，主隊最終輸119:129，錄得3連敗。
38歲嘅鄧肯上場對灰熊落場48分鐘，今場鬥拓荒者都打咗43分鐘，仲入到32分，加埋10個籃板再次造出雙雙，而且今場加時3次開波都tip贏，真係有心有力。不過，球隊另外兩位主力柏加同尼納特仲養緊傷，喺咁頻密嘅賽程下連輸3場都冇計，教練普波域治賽後都話為班球員感到自豪。
NBA對上一次出現一隊連續兩場要激鬥3節加時，已經係63年前嘅巴爾的摩子彈，馬刺就成為第3支名留青史嘅球隊；但兩場波都輸晒，就係史上第一次發生。計埋今場，馬刺今個月打4場加時都全輸，認真冇運；不過，經過今場嘅好人好事，話唔定善有善報，自此轉運。暫停時間，球隊提早送咗份聖誕禮物畀13歲嘅小球迷Noah：駐守阿富汗嘅軍人家姐Megan由球場中央嘅巨型禮物盒走出嚟，Noah即刻興奮到衝上前攬實家姐，場面極度感人。
今鬥小馬怕腳軟
喺11日內輸足5場嘅馬刺，今日要打back-to-back，硬撼朗度加盟後組成超強陣容嘅小馬，真係戥佢哋班老將擔心。甚至有口痕友講笑，話馬刺今場可能又要chur盡玩加時，連續3場都打夠3次加時喎。（now635台今日9:30am直播）
識睇，一定係睇足英台【英波Live】：
http://soccer.appledaily.com
http://bit.ly/engballlive