容天鵬畀網民封做周末贏男，原因在於就算未計呢日賽事，對上六次周六跑馬佢例有馬贏，開倉兩季於周六賽日交出九WIN，成績冠絕全體練馬師。呢日佢於第四場派「贏男」出戰四班千六米，結果此駒重配潘頓一擊即中，留前鬥後直路一衝過晒，潘頓撳韁兼摸埋馬頸，慢條斯理過終點，贏到四個半身位甩晒轆返嚟，神神化化的五歲馬，來港直至第三季卒之首嘗勝果，第二名由「會心微笑」影贏「狄奧圖」拎到，後駒只跑第三，三T頭關開出熱頭冷腳，連贏派一千二百幾。
講番「贏男」，同潘頓夾檔兼特擅跑沙田A加3欄，人馬累積四戰同程一W三P全上名，其中三次都係呢個欄位，馬有馬性點到你唔信！潘頓第三場搏輸「無敵王者」做二奶，第四場憑「贏男」贏番夠本，不過落後雷神之頭馬數目依然係雙位數，衛冕形勢依然居於下風。