美國幾時加息呢個問題纏繞金融市場好一段時間，事關現代金融資產計價都由利率同時間構成，而美元係當今貨幣系統莊家，更加係動見觀瞻。
FOMC聲明如坊間預期，喺前瞻指引部份刪咗「相當長一段時間」一句，並將用詞改為「耐心」。市場即刻估，究竟美國係準備提早加息，定延後加息？其實今次聲明有路捉，因為已經唔係第一次。
2004年格林斯潘時代，美國聯儲局就玩過同樣嘅嘢。
‧當年1月28日FOMC同樣刪咗「相當長一段時間」一句，並將用詞改為「耐心」；
‧3月16日繼續維持基準利率1厘，重複「耐心」等調控措施停止；
‧5月4日維持1厘，但刪咗「耐心」用詞，改為「可預計停止調控措施」；
‧6月30日正式加息0.25厘。
點解坊間一般預期刪咗「相當長一段時間」代表六個月後加息？即來自2004年嗰次，前後約六個月。但今次FOMC雖然前瞻指引部份刪咗「相當長一段時間」，後文卻又特登擺番喺到，不過以引述形式呼應10月停QE，目的是想你估佢準備加息，但又唔好咁老定六個月後加，將市場預期進一步壓縮在更窄範圍內，衝擊就細。講白啲，就係要你唔敢賭單邊。
彈出彈入境界
呢套嘢，其實中國先係宗師。孔字話「不學《詩》，無以言。」唔係傾閒偈都要吟詩，而係春秋時代，外交好興用《詩經》嚟過招。例如晉國嘅姬重耳因內亂流浪各國，去到秦國時，秦穆公請佢食飯，席間吟咗首《采菽》，暗示你雖然嚟到我地方，但冇咩好嘢可以畀你。重耳近臣趙衰一聽，即時叫重耳拜謝，並吟唱《黍苗》，意思係扮晒嘢多謝秦國要慰勞我哋，打蛇隨棍上。如此一來一往，最後秦穆公發覺呢班人有料到，吟咗首《六月》，代表重耳贏。因為首詩暗示秦國會出兵幫重耳返晉國奪位，而姬重耳就係後來春秋五霸之一嘅晉文公。
儒家文化圈受此影響甚深，日本嘅明智光秀發動「本能寺之變」前，亦吟咗首《愛宕百韻》「今時細雨五月天」，利用日文諧音，暗示「我土岐氏，五月將取天下！」睇吓在場嘅人跟唔跟。就算今日嘅外交、金融、行政仍然保留呢套，只不過由吟詩改為遣辭措意玩pattern。
咁樣做嘅目的，只有一個，就係留有轉圜餘地，達到《九品芝麻官》內吳啟華彈出彈入境界。六個月後唔加息，佢會話我邊有講過；六個月後問佢做咩加息，佢會話我一早講咗。香港係國際大都會，中西文化交滙地，呢種彈出彈入境界，近年都見唔少。
Mr. Tregunter