記得《金枝慾孽》的孫白颺嗎？還有《掌上明珠》的何祥興，都是林保怡演過的角色，拜處女座的執着，雖然曾被人指扮大哥，卻成就他榮登視帝。回想兒時等鄰居開電視，已足夠成為他的浪漫，更上一層樓浪漫亦與時並進。對林保怡而言，可能更重要的是學好功夫等運到。
撰文：何永寧
訪問當日約在下午4點，林保怡早15分鐘就已經來到，身旁只有一名女助手，沒有化妝沒有補粉就埋位拍照，對於出名挑剔的處女星座人來說，有點匪夷所思。
近日林保怡為吳宇森執導的電影《太平輪：亂世浮生》宣傳，他表示已經是第二趟拍吳導的電影，多年前已合作過《辣手神探》，林保怡說：「嗰時喺太子道吳導演辦公室見面，佢問我介唔介意幫吓手，我心諗『嘩，有周潤發，梁朝偉都係冒起緊』，梗係答應，導演就係咁客氣嘅人，今次佢又叫我去北京辦公室傾偈，佢話『一齊玩囉』，就算明明係佢幫緊你，佢畀你嗰感覺好舒服。」
性格執着不勉強
林保怡認同吳宇森是一個浪漫的人，電影中的槍火是用來推銷浪漫及激情，今趟《太平輪》則打正旗號以浪漫愛情為主，他說：「重點喺三段情，黃曉明、宋慧喬、章子怡幾對人嘅亂世感情。」
出身清貧的林保怡，電視機是兒時的奢侈品，等隔籬屋開電視是每日的浪漫，他說：「老竇搵一日錢，就有一日飯食，玩具通常唔會有，每日最大嘅娛樂係等隔籬屋開電視，我就喺度聽。」到長大成人，浪漫的定義除物質外，例如有一架夢寐以求的車，又或睇一套喜歡的電影三趟，就算找到一個可以溝通到的人，都是一件足以浪漫的事。
林保怡浪漫亦篤信命理，他將自己的執着歸咎於處女星座的性格，他說：「仲喺大台嘅時候，啲人成日覺得我扮大哥推戲。有時唔係唔想拍，係睇咗劇本，覺得應付唔到先唔接。你搵第一次，我應付唔到，你再搵我做同一部戲都係應付唔到，推得多啲人就覺得我扮嘢。」到離開大台執着依然，他說：「到出咗嚟闖，每日都有好多劇本過手，有時同自己講『係咪唔好理好壞，搵3年錢，每年拍6套劇，搵夠錢就退休？』不過我寧願食一碗麵，好食到連湯都飲埋，好過食到一半覺得唔好食唔食。」
被嘲唔識普通話
你會發現林保怡在大台的產量不多，不過憑藉《掌上明珠》獲封「亞洲視帝」，他笑說：「我信一命二運三風水，運到嘅時候就會爆出嚟，運到都要你平時練好功夫。」就像他近年到內地發展，普通話派上用處都是拜多年前一位老北京帶挈：「有年返北京拍嘢，一位老北京走埋嚟傾偈，嗰時一句普通話都唔識，要靠繙譯。位老北京話『中國人連一句普通話都不懂』，之後我走買CD學普通話，𠵱家咪用得着。」今次在《太平輪》，林保怡的普通話連帶視帝榮銜一次過派上用場：「我演宋慧喬表哥，仲有好多表妹姨媽姑姐姑丈，佢哋唔係內地影后就係影帝，全部都係演得之人。」
去對於電影分成上下兩集，又被指情節與《鐵達尼號》（Titanic）相類似，林保怡說：「唔係有隻船就係《鐵達尼號》，我覺得吳宇森導演講得好啱，現今嘅80、90後去睇電影，唔應該淨係睇啲笑完就算嘅戲，可以嘅話，要睇啲有message嘅電影，同埋唔好覺得慢就係悶，花啲時間去睇值得睇嘅戲，都係一種享受。」
【老爺車寧修不賣】
男士都愛車，目前林保怡除有一部7人車用來接載出入之外，另外就有一部13年車齡、前後經歷4手車主的Audi TT，林保怡說：「部TT仲要係棍波，不過我成日唔喺香港，擺多過用，同埋架車咁舊成日要整，計落個車位仲貴過架車。但就係因為鍾意，整就整冇諗過賣，你問我點解？我都解釋唔到畀你聽。」男人與車的關係，女人很難理解，你覺得浪費？男人卻認為浪漫，所以最近林保怡購入一輛跑車並稍後到港，雖然堅拒透露型號，主觀願望覺得林保怡揸林寶（林寶堅尼），整件事應該近乎完美。
