先旨聲明，下文有古靈精怪內容，少鹹多趣，講體育之餘亦講睇肉，衞道者勿看。
夫運動員者，體力旺盛，精益氣湧，血液運行奇佳，肌肉爆發力強。足球員要綠茵場上奔走上下半場連加時，籃球員則須追趕轉跑跳射，體力皆異稟也。
既有過人體力，有時多得滯又點使減啲？莫非好似政府班天才，建議社區舉辦舞會，就可以幫青少年發洩精力，減少上街爭普選嘅機會？如果係，警察成日都去跳舞（偷偷哋嗰隻），點解仲扑人扑得咁「行」？
運動員過多精力，通常都去骨場做物理治療，除咗有舒適寬敞嘅慾池……編輯對唔住，係浴池，仲有熟手機師……又寫錯，係技師，喺咁優美嘅環境下，真係賓至如歸，連屋企都唔想返。難怪當年偶像山度士（圖）喺維多利X桑拿「的」波嘅雄姿，深深咁印喺每個熱愛足球嘅香港仔腦海中。女士們，即使維記係……，男人入去，其實好似《足球小將》嘅戴志偉一樣，追緊足球嘅夢，又或者入去追球星。
真人真事，朋友喺07/08年間，過馬交X令骨場，竟然見到偶像喺面前：二哥，與其公牛鞭。喺冇紙筆冇相機嘅情況之下，一個fans嘅無奈莫過於此，而身處骨場因為另一個黑人而興奮亦係塵世間嘅荒謬。
又有朋友，見過勒邦於「馬交候機室」挑選「機組人員」，亦有人3年前喺「上海機場」巧遇柏迪亞，全部冇證明而證人又唔肯公開身份，但入樽男兒永留心中。
梁栢堅
填詞人+彩池人