拜仁慕尼黑喺2014年最後一場正式比賽，戰果一啲都唔意外，但過程就有啲驚險，上周五作客緬恩斯靠洛賓喺補時入波以2:1險勝。一早鎖定咗冬季冠軍嘅拜仁以破紀錄至少11分領先優勢過聖誕新年，唔單止喺德甲無敵，就算同其餘4大聯賽勁旅相比，一樣咁勁。
拜仁今場波表現一般，不過踢得唔好但照樣贏波，都係勁旅必要條件。拜仁喺21分鐘先失守，3分鐘後由正選披甲嘅舒韋恩史迪加扳平，亦係佢喺今季第1個德甲入球。踢到補時階段，洛賓近射搞掂幫拜仁以2:1絕殺對手，以德甲8連勝進入歇冬期。拜仁踢咗半季聯賽，17場14勝3和，係𠵱家5大聯賽裏面唯一一支不敗球隊，兼且仲有唔少威水紀錄（見附表）。教練哥迪奧拿總結半季演出話：「我對球隊喺上半季演出好滿意，可以不斷調整去克服困難，祝大家聖誕快樂。」
拜仁確係幾乎無敵，但追捧嘅球迷始終要小心，佢哋今場波僅贏對手，近4場聯賽第3次開「讓球主客和」「和局」，到𠵱家半季聯賽亦只有7次「讓球主客和」贏盤，讓幾多都照追拜仁，隨時損手爛腳㗎。
識睇，一定係睇足英台【英波Live】：
http://soccer.appledaily.com
http://bit.ly/engballlive