若果大家細心留意的話，2014年嘅娛樂圈，除咗好多結婚生仔拍拖及分手新聞外，唔知點解仲多咗好多小三（或疑似小三），唔只喺香港呀，就連台灣﹑大陸甚至韓國，都爆出小三新聞。
彭順﹑李心潔﹑李悅彤
當中以27歲0靚模嘅李悅彤（Liddy）偷嗒李心潔老公彭順最為轟動。於五月廿三日，Liddy被本報獨家踢爆與彭順喺圓方啜爆，事件震撼娛樂圈，形象插水嘅彭順急返大馬搵心潔箍煲，而心潔亦原諒老公，至於Liddy即潛水避世。
呢單新聞連日來出現各大報章雜誌頭條，甚至連港聞頭條都上埋。事關六月初喺九龍灣啟晴邨發生槍擊案，疑兇李德仁就係Liddy父親，李父最後吞槍自殺，轟動全城！
Liddy與母親認屍後即返內地，至7月下旬，Liddy終於喺instagram留言訴說對父親思念，之後Liddy繼續蒲頭，似為復出鋪路，除咗同母親齊接受本報獨家專訪外，Liddy仲接受有線訪問及拍攝真人騷，並會為擔正嘅電影《四非》宣傳。
周焯華﹑陳慧玲﹑Mandy Lieu
混血模Mandy Lieu今年8月被爆搭上已有家室嘅澳門江湖大佬「洗米華」周焯華，而Mandy更喺微博高調承認，與洗米華發展中，仲話唔計較男友背景云云。不過事情發展落去，就真係好睇過大台啲膠劇。
事關洗米華正印陳慧玲火速還拖，仲晒一家三口合照擊退小三，更傳洗米華為老婆飛甩Mandy，點知原來兩人分手只係一場戲，11月中，Mandy人肉速遞到澳門陪洗米華賭百家樂，佢仲化身人肉梳化及三陪女郎，全程陪賭﹑陪坐及陪笑。
然而事情發展到12月初，Mandy Lieu寓所被爆門疑遭整蠱，因為當日有人報警求助，指友人疑在中環亞畢諾道家中暈倒，警方抵上址後破門入屋，但發現屋內冇人，咁啱上址正係Mandy寓所。事後Mandy突然「人間蒸發」，惟12月16日洗米華偕懷孕妻出席慈善活動，湊巧Mandy 同晚突現身養和醫院，佢當晚按住肚仔嗌好痛，大批傳媒守候，不過之後佢再「失蹤」。
汪子琦﹑富婆Laura﹑馬賽
愛嘅反面就係恨！馬賽同內地斷背製片汪子琦分手後反目收場，今年7月網上更流出馬賽艷舞片，事後馬賽開記招哭訴，短片係應舊愛要求拍攝，佢又透過短訊發聲明：「很肯定愛錯了！」不過汪子琦就反擊係馬賽架好相機自編自導自演，並指控馬賽母女貪錢，要求每月20萬家用及600萬養女費，更大爆兩人性史指馬賽愛玩制服誘惑。
周永恒﹑趙頌茹﹑劉依靜
8月底時，周永恒爆出家暴醜聞，打走老婆趙頌茹（阿Yu），而阿Yu更揭老公偷食，小三正係25歲劉依靜（Ruby），周永恒直認有婚外情，而阿Yu就啞忍家暴一年，其後愈揭愈多，而周永恒於9月23日向太太發出「死亡WhatsApp」，恐嚇要殺死妻女及自殺，並到妻子屯門的外家大吵大鬧，結果被警方拘捕，並控以刑事恐嚇罪。
10月10日案件再於裁判法院提堂，由於控方需時調查，案件押後至12月19日再提堂，其間周獲准保釋外出，但須每周兩次到警署報到、不准騷擾證人及不准踏足屯門區。至12月19日，周永恒再現身法庭，Roy被判普通襲擊罪罪成獲准保釋，下月（1月）底宣判。
九把刀﹑小內﹑周亭羽
除咗香港爆出小三外，台灣方面都有爆出小三事件，好似本身有要好女友小內的作家兼導演九把刀，十月時被踢爆與中視記者周亭上汽車酒店開房，引起軒然大波，事後九把刀開記者會認偷食，並以三千字懺悔錄對不起小三，而小內最後都原諒咗九把刀，周亭羽亦已復工，不過就被調職。
彎彎﹑何吉原﹑黃大爺
同九把刀份屬好友的台灣知名插畫天后彎彎（胡家瑋），5月中與拍拖10年男友結婚，豈料6月時被揭發與人氣部落客插畫家「黃大爺」（黃建銘）有婚外情，當時兩人被拍到約會，又攬又錫，事後彎彎鞠躬道歉，過咗兩個多月後，彎彎再度蒲頭，並表示獲老公原諒。
李秉憲﹑李敏貞﹑Dahee及李智妍
而喺韓國，型男李秉憲9月時被爆背住靚老婆李敏貞偷食，李秉憲被女團GLAM成員Dahee及女模李智妍以不雅短片威脅，勒索50億韓圜，兩女及後涉嫌恐嚇罪被起訴。
除咗佢哋外，林師傑﹑傅嘉莉﹑文章及吳佩慈的另一半，今年亦捲入第三者風波，滿城風雨。