跑步與踢波一樣，唔同年代有唔同體會，唔同體質嘅朋友亦會有唔同睇法。
10歲前，跑步是遊戲，爭先恐後都開心；10歲後，跑步是比賽，開心嘅人少咗好多。20歲前，跑步是爭第1，跑跑吓擰轉頭見到冇人就興奮；20歲後，跑步是唔好包尾，跑跑吓擰轉頭見到有人就興奮。
30歲前，跑步是浪費時間；30歲後，跑步是珍惜生命。40歲前，跑步是群體活動，人越多越開心越搵唔到唔跑嘅藉囗；40歲後，跑步是個人show time，有番啲約會自己嘅樂趣，約人仲分分鐘跑唔成。
50歲前，跑步是毋須熱身嘅；50歲後，跑步大部份時間都用在熱身。60歲前，跑步是以速度記錄，咩距離跑到咩時間好巴閉；60歲後，跑步是以時間記錄，跑得耐就係叻，話之你原地踏步。
70歲前，步伐快但表情痛苦，個人心理同生理好唔平衡；70歲後，步伐慢但表情enjoy，表裏終於合一，回復10歲前嘅境界。
踢波道理多。10歲前，踢波是去波波池，男女一齊玩；10歲後，踢波是去廁所，男女有別。20歲前，踢波一定做正選，否則好hurt；20歲後，踢波最好唔係正選，因為做後備遲到冇人鬧。
30歲前，睇人踢波是浪費時間，自己踢好過；30歲後，自己踢波唔捱得幾耐，焗住睇人踢波。40歲前，踢波是英雄主義，最好全部波都係我我我入嘅；40歲後，踢波是官僚主義，不求有功但求無過，最好所有失波都唔關我事。
50歲前，踢波是唔使熱身嘅；50歲後，落場踢波大部份時間都好似熱緊身。60歲前，踢波是以贏幾多場波做記錄；60歲後，踢波是以踢咗幾多場波作記錄。
70歲前，踢波是為咗唔使吹水，講多無謂，踢波實際；70歲後，踢波是為咗呃水吹，踢唔踢，有乜所謂。橫掂絕大部份波友，其實都係講叻過踢。
KEYMAN
節目主持
電郵：mailto:[email protected]