過埋今年，香港大律師公會又要換揸fit人咯！八方聽聞，公會明年1月改選，勁like《低俗喜劇》嘅高登佬石永泰會退下火線，大熱主席接班人喺一位女士，現為公會副主席嘅譚允芝Winnie。
雖則話接任主席要經過選舉箒，但有大狀笑笑口話，公會有個不成文慣例，通常由副主席順理成章接任，而其他人亦唔會出嚟爭。
執業於德輔大律師事務所嘅Winnie，曾經喺倫敦大學學院同8 New Square大律師事務所接受知識產權法專門訓練，喺知識產權法方面好「打」得；而佢同時熱愛音樂，現為林耀基中國音樂基金副主席，一對仔女係音樂發燒友。
有行內資深大狀話呀，Winnie雖然唔支持佔中，但都係開明派，當年都有反對過替補惡法。之前基本法委員會主任李飛來港，Winnie都拍住石永泰去講意見兼見記者，唔知有冇喺高登佬身上，學番一招半式？