某些人心目中，男人要放侍產假，等於英國想監督香港的一國兩制，都是不合理要求。
但講明叫「中英聯合聲明」，英國在香港事務是有角色的。
同樣，某些人心目中，男人點會放侍產假？又唔係你生仔餵奶，不如俾你放埋「侍M假」好冇？
但其實，男人真係需要餵奶。
餵奶唔係灌鵝肝，要飲一下停一下掃一下風，如果餵太長時間你又要Reheat奶樽。
整個餵奶過程大約四十五分鐘……如果你是一個熟手技工。但作為新手家長，請再加「一小時」。BB每隔三到四小時便要飲一次奶，換言之，你就像一部跳線CD機，不斷重複餵奶……
你以為餵奶可以交由媽媽負責嗎？錯了﹗有些母親產後虛弱，出院後只能做一件事﹕睡覺。
於是，爸爸便要身兼母職，包括「換尿片沖奶餵奶掃風再餵奶」的地獄套餐，有時餵完奶已經雄雞初啼天已亮白，而爸爸雙眼通紅徹夜未眠。
在這種情況下，你忍心不讓爸爸請一天假在家中好好休息嗎？
媽媽產後身體虛弱，中國人坐月又禁忌多多，媽媽就等同一個大碼BB，等人照顧。
並不是每個打工仔都可以花萬多元請陪月侍候或者請外傭在家照顧，也不是每個打工仔都有福氣找到父母代為照料看家；很多時只有夫妻小倆口困獸鬥獨自湊B。
在這種情況下，你叫男士如何能安心上班，獨留兩個BB在家中，疏忽照顧？
究竟是三天侍產假還是跟隨公務員五天假甚或更多的七天假，都可以討論，但請記住，侍產假是男人應得福利，政府和建制議員，請不要當作乞兒施捨。
張宇人問：「生仔大晒啊！」，打工仔反問：「生意大晒啊！」
其實生仔唔係大晒，而係大×晒啊！