隔牆有耳：
陳家洛當郭家麒　Tree根搞錯「唔出奇」 - 李八方

民建聯Tree根鍾樹根呢期人氣爆燈，噚日佢喺辯論增加青年上流機會議案時，簡單到只係交代一下自己個黨嘅投票立場，咁都俾佢搵到個位可以出醜，真係無敵！
個議案係經民聯林健鋒提出，工聯會郭偉強、新民黨田北辰、民主黨黃碧雲、公民黨陳家洛、工黨李卓人同埋教育界葉建源就提出修訂。Tree根發言想話民建聯會反對泛民提出嘅修訂，但將陳家洛叫咗做郭家麒，陳家洛聽到固然笑到擰晒頭，接住Tree根發言嘅公民黨黨魁梁家傑就話，「鍾樹根呢啲錯誤呢，我哋都唔感到意外嘅」。白紙黑字嘅嘢，Tree根都可以睇錯，八方開始懷疑佢係特登博見報。