「今次真係死過翻生！」拔萃男書院（藍衫）兩個月前大炒喇沙書院，噚日喺全港學界籃球精英賽16強再遇老對手，就幾乎俾對手復仇成功。好彩隊長陳怡富及時發威，領軍險勝47:40，但就為衞冕之路埋下隱憂。男拔早前喺第1組初賽大炒喇沙24分，有多個港青坐陣嘅男拔，今仗初段慢熱下多次俾喇沙打亂進攻節奏，由開賽領先8:1，被力追到半場只領先19:17。
喇沙第4節更加反超前38:33，好彩男拔隊長陳怡富連搶4分拉開比數，最終小勝47:40。主力葉偉恒賽後話好似死過翻生，射手安家仲都話：「今仗有啲輕敵，錯失好多反擊機會。不過下星期一先係8強，我哋會加緊練波，調整戰術擊敗裘錦秋，爭入4強。」至於寶覺中學雖有主力文俊浩腸胃炎缺陣，但就以53:31大炒中華傳道會李賢堯紀念中學，同宣道中學爭入4強。
識睇，一定係睇足英台【英波Live】：
http://soccer.appledaily.com
http://bit.ly/engballlive